咁大個女，由幾歲開始去旅行，參團無數。
互相社新春行大運....青蛙旅遊大陸一天遊...和聯豬仔團...生活體驗既師生旅行團....
新新舊舊既領隊見唔小，不過呢次既領隊真係十分非常之離譜！態度極差！


例一：分房
佢check-in之後攞住一大堆野過黎團友既附近，講左一大堆房間既事項，之後分房。分左房既團友就當然先行一步上房啦，因為我地仲未食晚飯，而且晚飯係要食自己架！分到一半，佢發現未寫齊野係張『溫馨提示』到(當時仲未分到我)。佢一轉身向已經行開左既團友大喝一聲『咪走住！返黎！』。行左大半既團友拖住d行理行返轉頭，佢就忙住將手上未派既『溫馨提示』加返detail上去，當個幾個團友行到佢身邊佢就攞返黎寫兩寫又『隊』反俾人。寫完之後又再埋個幾間房，幾個返轉頭既團友就算攞返張『溫馨提示』都唔再行開，唔係一陣又俾人叫返轉頭。分完之後佢就只係講左句『房有問題就打去我房啦！』之後就行開左啦！簡直當團友係狗咁『旺財，咪走！返黎！』用既語氣一樣！團友行左返黎佢連講句野交代吓都無，攪到人地個個企晒係度！
而我個Group係單數，我又無request要單人房，佢只係俾左幾間房我就算乜都無講，咁我當然問吓佢『我地單出黎個人住邊間？有無人同佢同房？定邊間係單人房？』佢既回答係『你地要求double bed麻，3間房都係一張床，無分別架！Double Bed唔係度度有架，做到就做啦！』佢係唔係答緊我問題呢？

例二：Check房
有人同佢講房燈有一盞開唔到，佢睇吓就走左去，乜都唔講。最後個團友等左成晚都無人理佢，好彩既係只有一盞開唔到，個團友都唔理。
另一個團友話間房既泠氣改唔到度數，按左上去一陣又跳返原來既度數。佢同個團友講『咁可能而家轉返中央泠氣，上次係要自己教，而家可能轉返啦！』之後個團友轉去同其他團友講佢既經過，而其他團友就話溫度係改唔到，不過就會自己轉。佢地講講吓既時候，領隊竟然講『得啦！你唔洗講啦！一定係中央泠氣！我知啦！』從語氣中表現出佢極不耐煩。最相近既語氣就係阿仔怕左煩死既阿媽時講既『得啦！阿媽你唔好咁煩好唔好！我知啦！』。事發地點係餐廳，大約一半既隊友已經到左等開飯，當時大家聽到佢既回答之後都靜左一陣，而佢就自己行左去門口。雖然當時團友以高談闊論既方式交談，但我估無一個領隊會用咁既語氣回應客人架？！

例三：換錢
係香港機場，領隊已經大大聲聲咁同我地講，佢同導遊係無錢換既，要換就自己去當地銀行換，機場有。
有一次去到購物點，有好多唔買野既團友當然會行返出街先啦。我地見錢都用得差唔多，街口又有間銀行，團友又未買完，當然係快快手手入去換錢啦！我行去銀行既時候，我經過我地架旅遊巴，個司機仲開門俾我，以為我係黎上車！我估我入銀行前後都係用左10分鐘左右。但領隊一係間鋪出黎見我組人仲係車門口唔上車，佢就叫我個組人上車，咁我既組友就同佢講我地去左銀行，好快就得啦！佢就同導遊一齊入銀行搵我地，佢一入黎同我講『上車啦！』我答佢『得啦！攞埋錢就走得啦！好快！』導遊就已經同我地講『快D啦...吓』然後佢就轉身走。但領隊就好似聽唔到我講野咁，又講多次『上車啦！』於是我指吓counter講『攞埋錢就走得啦！』佢竟然同我講『係臨時車位黎架喎！！唔等得！要走架啦！』我當時唔鬼理佢轉身向住counter，佢就轉去另一個組友到講『要行架啦！』我組友就點吓頭，佢就再問『你地係機場換左好少錢咩？』我個組友見佢唔死心就同佢講兩句『唔知呢，不過都用得差唔多啦！』之後佢就一直企係門口唔走，等到我地行出張我押上車咁！
我心想錢就俾左人，我又未收返錢，你話『唔等得！要走！』咁我係唔係唔要錢跟你走呀？定你想我講『唔好等，走啦！』？？

例四：唔做野
全程只攞過2次咪，第一次係第一日介紹導遊，第二次係最後一日收小費。

例五：做假意見書
佢明明無著制服返香港，佢仲大大聲同我地講『領隊有無著制服回程，呢個真係唔得，我俾大家睇吓，呢件就係制服，大大隻字寫住縱橫遊，買晒廣告咁，叫我點著？我雖然無著，但我有帶住架！咁大家就幫我寫我有著啦！』
幫公司買廣告有問題嗎？你無收錢既？！

裝燈既大日子。點解大？因為我奶奶又3查4查，問完又問。所以可以搵到一日裝燈就真係好大日子架！

師傅用左1個鐘就裝好3盞。
好靚....水晶燈真係好靚，不過香港買既一般啦....
師傅再用左半個鐘裝大陸燈既底盤。
但原來有一盞佢裝得唔好，我地睇黎仲要再裝多次.....真係唔低呀！
然後我地兩公婆用左2個鐘至掛好一盞水晶燈....

開燈後.....嘩！好靚...真係好靚！

係奶奶一次又一次(一日多過5次)既叮囑下，我地一行3人係放工之後正式入伙。
又要3個人一齊返去, 又要佢行先, 又要生果同行。
入去仲要大講四字經....出入平安，好生好運....

終於比佢煩完啦....我地兩個立即入房，關門大吉.....睇電視啦.....

入伙...好多人都係行入去就算....但就比我奶奶攪到煩死人！

中國人幾時至可以淘汰呢班人？

我今日先知乜野叫迷信！

今晚同奶奶食飯，佢成晚都唔食野。叫佢食多D菜佢都唔肯。
原來佢今日整親隻牙，所以食唔到野。
我地叫佢明天好早D去睇牙醫啦，唔好等上大陸至整啦，痛親自己麻。
佢竟然同我地講『明天初一，我真係唔會去！』

天呀！痛到飯都食唔落仲要顧住係初幾？真係佢至得！
唔通係初一個日斷左隻手都唔可以去駁返佢？要等初二至可以駁？
初一心臟病發都唔可以去急証室，要係屋企等死？

真係頂佢唔順，不過我又唔可以拖佢去，佢自己痛到食唔到野，都係佢自己辛苦。

呢幾日因為搬屋，新屋又唔入得去住，搬左返阿媽度住，回復兩年前既生活。
真係開心左好多，唔洗日日都對住奶奶。
我老公就慘D，阿媽日日分分鐘都思仔病發，一日十幾個電話，問長問短。個股市又波動，阿媽仲要打多幾個電話黎訓示唔好入貨，訓示出貨時機。
阿仔到夜晚返黎同我講『煩死啦！』
我同佢講，佢足於知道我既苦況！

行左幾間窗簾，大都要千幾蚊至可以買到成屋窗簾，都幾貴。
最後我地係荃灣戴麟趾後面既鐵皮屋到見到，問左都係$820就車到成間屋。
一於好小理，車黎用住先，第二時見到又平又靚既咪再車過。

燈，仲有2間房燈 + 走廊燈未買。
今日走入一間燈鋪，見老闆娘又幾好人，D款又幾好，用左$1150買左3盞燈。
其實都幾貴，不過點都要買架啦，早D買左，又早D了結左一件事！

仲有傢俬！最貴係佢呀...成萬幾蚊.....

本來預計7:00先起身，但早上6:30已經起左身，因為訓唔到，太多野未執。
清埋D手尾已經8:00，但厠所既野一樣都未執過....
搬屋既人已經到啦....慘！
總共Pack左53件，有好多仲係幾件紮起。
估唔到我地有咁多野既！？
辛苦左咁多日，終於搬完啦.....開心
但亦係煩惱既開始....又要將D野搬返出黎！

下午仲要去睇窗簾、燈、鞋櫃等等...等等，唉~~~
仲有好多手尾要跟.....


晚飯仲要出街食，因為係我舊曆生日，為左奶奶高興都係要出去食一餐。
真係慘...唔食得唔得呀？成身都痛爆！
不過太子鳳城就真係好得既，就算佢服務再差我都會去多幾次！

明天就要搬屋啦！不過仲有好多野未執好。唉~~~
明天仲要一早搬添....
努力！
Pack電腦啦.....

今日老公舊曆生日，例牌大閘蟹宴。
今年既大閘蟹好似平左，東海食普通既一人大閘蟹餐都係$288，蟹皇宴就$398。
不過大家都係蟹工，只係四襾同六襾既分別。
一行5人叫左個6人餐，各樣菜都係6份。
但各樣菜水準都比舊年差，唔知係唔係價錢既問題。

蟹粉小籠包：正!
濃湯巴楚菇燉翅：淡，翅有骨，明顯係湯有湯煲，料有料煮，上碟先放埋一齊。
主角~大閘蟹：無油，膏亦比舊年小。
芺蓉蟹籽：蟹腳肉+玉子豆腐，不知所謂！
籠仔蒸東星班球：得一片魚肉，份量極小。不過味道、肉質尚可。
蟹粉蘿白糕：用粥鋪既槳粉蘿白糕，一D蘿白都無。蟹粉既份量小得可憐，上年食一人餐4片蒜蓉包都有咁多蟹粉，今年食6人份量又係得咁多.....
菜：一般
生炒糯米飯：其實應該改名叫生炒臘味飯好D！因為臘味就勁好食，非常之香。但我一D都食唔出有糯米！似粘米多D，好失望！
薑荼湯丸：正！夠薑味，湯丸皮薄料多。

係香港燈鋪行左咁多日，是但一盞水水晶燈都要2千幾3千。聽朋友講深圳田貝四路有好多我地要既款買，價錢都只係幾百蚊。
上網做左成個星期既工課，今日出發睇吓可唔可以買到平貨。

一上到去搭1號大巴，第十個站落車。
嘩~嘩~~嘩~~~ 未落車就已經見到好多燈鋪，間間都係水晶燈。
行左半日...講左好多次價....終於用$1350蚊人仔買左2盞水晶燈，雖然香港無呢D款，但都幾靚。
而且搬落黎都好容易，唔一定要請托運。
如果講其他燈，香港既價錢起碼貴一倍，一樣款既都有。我估香港好多燈都係大陸落，食水真係深。

不過Check貨要好小心，因為真係好多次貨。

第二日啦！但仲未決定到邊日搬。
但我都已經叫老公問定搬屋公司可唔可以改，洗唔洗加$$等等....

煩左成日都無黎結果，最後我都公話，既然唔可以決定，而星期六又唔好，咁就改星期日啦。唔多好總好過唔好啦！ 突然覺得老公好威呀！

不過，世事既野就係咁啦....係你意想不到既....
就係我老公打俾我奶奶講決定要星期日既時候﹏﹏佢竟然同我老公講，『我問過人啦，星期六搬都無所謂喎！唔好改啦！』.......

真係頂!頂!!頂!!!頂!!!!頂!!!!!

今天奶奶竟然記得搬屋個日係我舊曆生日！！又話唔好要改！！
打俾我老公，煩左佢成日....
我老公本來就無所謂，但佢驚對我唔好都想改，但我同老公講改既話就要請假。我地又無$$又無假，唔好改啦。
於是佢就同阿媽講唔改。
到放工時間，我奶奶竟然又打俾我阿媽，同佢大講個日唔好日，而且又係我生日，有100個唔好。
最好就星期五搬！仲問我阿媽有無時間一齊睇住搬...唔洗我地係到。

星期日又話唔好，星期三又係佢個仔生日，呢個搬屋日子係一個月前就定左，定個日佢都係度。
真係唔急死都唔出聲，不如搬個日至講呀！

成餐飯既時間都係用黎講改邊日好，講好左打去問奶奶，第一次佢又話無問題，唔夠半個鐘佢打黎又話唔好。
講吓講吓到訓個陣都未決定到邊日。

呢個星期發現今年有好多BB出世！
係我識既人入面都有6個BB已經出左 or 快要出世！
雖然話人大左又係生仔既年齡，但都唔係一下止知道咁多friend生BB架！
而且有D Friend係大我好多，我跟本無想過佢仲會生BB。
有D呢就大唔透咁，但佢竟然生左BB！真係估唔到咁快！
有D仲出奇，結婚都唔多原架啦....竟然個老婆有左！哈！

世間既野真係有好多估唔到！

尋日已經發現唔見左把拉尺，但左想右想都唔知佢去左邊！
自己就覺得好肯定係屋企，但點知黎黎去去都搵唔到！
老公提出會唔會留左係宜家！！因為星期四去睇傢俬既時候攞過出黎用。
但我自己就覺得星期五都仲見到有！
唔通我思覺失調？
病到傻左？

今日一早要去新樓度整住客證、八達通、石油氣...仲要去買把新鎖！

一早起身又pack左D雜誌，順路...可以買左佢。點知.... 紙價竟然趺到得返$1.1。
今次比上次重，但$$仲少左！

去到買鎖，原本以為買把好d既要5, 6百蚊，點知德國做既名牌鎖都係$350咋！

入到去，做住戶證、八達通、開石油氣都整左幾個鐘，都幾煩。
上到樓，第一件事就當然係換鎖啦....看圖照換...整左成個鐘至得，不過到底都係唔多合位。無法啦...我又唔係大師傅！
不過已經覺得自己好勁！

最後....攞晒D殺蟲『炸彈』出黎，炸！炸！炸！殺！殺！殺！
再焗佢幾日，今次仲唔殺佢全家？！！

但自己呢？都唔好得好多....今個星期姨媽到，本身以為係個D唔舒服。但到左今日個頭痛到差D爆開！頂唔住，都係食藥，然後好好地係屋企訓吓！

今日到收鎖匙既大日子，好開心，好興奮。但係要等到晚上至可以收樓，有D心急。

點知下午妖到個天大既惡號，今晚睇黎都唔可以準時走！

到差唔多8:00唔理咁多，走人先！
去到agent到，原來佢今日放假，只係要我地簽收鎖匙就得啦.....$$都唔洗俾住

新居終於到驗樓既日子啦！好開心咁去驗樓，順便度埋呎吋去買傢俱。
但奶奶既出現真係令人好煩...
老公話約左10點鐘，但9:45打俾經紀，佢仲係荃灣！我已經問我老公你有無記錯，無理由經紀會遲咁多！
原來真係我老公自己記錯，我奶奶已經發晒脾氣話個人咁差。點同佢解釋佢都當街話人地衰。成條街咁多人，真係『魚』爆！
上到去屋，佢多多意見，我一於小理，推我老公俾佢。
點知佢死人都唔放過我，當我同我老豆講緊D傢俱想點放既時候，佢就成日都插把嘴埋黎：『阿嫂，張梳化放呢到好D呀...不如放呢度啦...』
我已經唔多理佢，叫佢同佢個仔講，話係佢個仔話事，我只係講俾我老豆聽，等佢幫我度吓位。
但佢就死都唔放過我，係都要同我講....我只好返去老公身邊跟出跟入....等我老公答佢！

最後，我老豆都忍唔住講左句：『間屋係佢地既，又係佢地住，等佢地自己安排啦！』
我老豆一向都唔多出聲理呢D野既都忍唔住....真係煩死人！

本來開心既一日變成麻煩+頭痛既一日...

等到星期六啦！
今日有好多野做架：上律師樓簽樓按，驗樓，賣雜誌...
早兩日執好既雜誌終於可以攞去買！
一早攞好晒野就出門口啦....個兩個背包真係好重....
一路行去律師樓既時候已經覺得佢好重，由律師樓再去賣書既回收店既時候真係舉步維艱。
雖然只有5分鐘既腳程，但我真同我老公都覺得行得好辛苦！
原來賣紙皮都好難架！
最後，我地既辛苦換返$20，都算唔錯。值得！值得！
屋企仲有好多，今次發啦！哈哈！哈哈！ <--我老公話我傻左，得果$20都咁開心！

難得有一天國慶假期，雖然係星期三無得去旅行，但正好俾時間我休息休息。
中午12:00才起身，Pack左D廢紙，一心以為可以攞去賣，點知老公仔提醒我：『今日係國慶！如果唔開咁咪要搬出搬入？唔好玩啦！』 咁又只好放埋一邊，等星期六再賣過啦！

離搬屋既日子越來越近，好多野執 都係平時唔執野...而家一次過!!真係唔知點算！
今個星期仲話要打風，我地仲約好律師做樓契，約好業主驗樓...都唔知得唔得！

今天是國慶假前的工作天，全公司的同事都布沒有心情工作。
談天、講是非、plan節目...樣樣都有！
但今天我們的部門有新Director返工，好像有很大的轉變，但其實乜都無變！
一向在公司中、部門中都絛無乜講心、講感情。
但隨着換血越來越多，文化都開始改變。同事多左了解，講野多左，笑聲都多左、大左。
其實係一件好事，但MGR仍然超Cool，任何時候都以工事先行，最多都係討論吓new product。
唔知新Diector上任後會行乜野路線呢？
希望親民D啦...

家庭方面...
要搬屋！！對我黎講係第一次請人幫手搬屋。都幾驚執野架....好煩！成間屋咁多野，要一次過執晒都幾煩！
而且仲要對付我個麻煩奶奶！！真係死得...
事無大小都要話事...但又乜都唔知...簡直就越幫越忙，唔幫好過幫！
有乜方法可以令佢放手呢？