2008.07.12 - 行雷閃電呀!!!!

上一篇 / 下一篇 2008-07-13 17:46:36 / 個人分類：不定期

嘩................好驚呀!!
星期六的零晨時份, 祁生係廳打機, 我就係房上網,
總之就係房和廳之間出出入入啦, 零晨12點零鐘開始,
青衣呢邊開始勁大雨, 其實大雨都無咩問題,
我仲坐係窗邊睇雨景添 (唔知做乜突然間好感性)
去到點幾鐘個天就開始閃電行雷, 初時都係D正常D既行雷閃電,
去到兩點零鐘我都開始眼訓, 唔再陪祁生打機,
入房準備訓覺, 就係呢個時候開始, D行雷聲和閃電都勁過人,
D光和雷聲都超近好似係你隔離咁, 我仲比突如其來的勁光閃電嚇倒,
祁生都已經入房安慰我, 仲幫我關窗簾但係效果都唔係太好,
我熄電視試下訓, 但係間房一路比D閃電閃下閃下,
勁似恐怖電影入面的情節, 真係嚇到自己都唔敢訓呀,
又怕自己胡思亂想唔知諗左D咩, 自己嚇死自己先喎,
最終我都係要開住個電視機先可以訓到呢.........

其實點解我會驚突如其來的勁光閃電和行雷係有原因架,
事緣唔記得幾多年前既下午, 有一次係CWB行行下街,
天空突然行左一下旱天雷 (無下雨的行雷聲),
聲音超嚮勁大聲, 我比呢一下雷聲嚇到心臟加速跳動,
然後感覺係好痛, 跪左係人地時裝店門口,
D sales girl出來門口睇我咩事, 仲問我駛唔駛call白車,
因為當時我係唔知個心臟問題面青口唇白, 還是...
比雷聲嚇到面青口唇白...........

仲有一次, 當時仲住係Quarry Bay娘家, 都唔記得幾多歲,
娘家屋企面向山, 算係建在山上的屋苑啦,
又係得我一個人係屋企, 又唔知點解我好鐘意望窗睇雨景,
又係睇睇下既時候, 眼前一度好勁既白光劈落黎,
(當時係零點幾秒, 但只見到一片白光)
接住就係一下係你耳仔側邊嚮既行雷聲.......
跟住...............我係咸住打電話比媽咪.........。哈